Wikipedia:當年今旦/10月

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

今旦是2024年04月27號。 (刷新)

10月

10月1號：中國：國慶

• 前331年：馬其頓國王亞歷山大一世着高加米拉拍赢波斯大流士三世其部隊。
• 1367年：朱元璋拍下蘇州，將張士誠滅囇。
• 1946年：盟軍敆紐倫堡審判納粹德國其領導人。
• 1949年：中國共產黨其領導人毛澤東敆北京天安門城樓懸頂宣佈成立中華人民共和國(圖)。

10月2號：

• 1187年：埃及其國王薩拉丁拍下乞十字軍佔去88年其耶路撒冷。
• 1628年：明朝最後蜀隻皇帝崇禎皇帝登基。
• 1925年：英國儂約翰·羅傑·貝爾德發明電視（圖）。
• 1941年：納粹德國其部隊拍遘蘇聯其莫斯科。

10月3號：

• 1363年：朱元璋共陳友諒着鄱陽湖大戰，最終將伊滅囇。
• 1942年：納粹德國發射世界懸頂頭隻彈道導彈V-2火箭（圖）。
• 1949年：中華人民共和國共蘇聯建立外交關係。
• 1990年：德國正式統一，信社會主義其德意志民主共和國滅亡。

10月4號：

• 23年：綠林軍拍下長安，將皇帝王莽刣死。
• 1929年：美國股災，股市全部大盪。
• 1957年：蘇聯其史普尼克1號（圖）發射成功，嚽是頭隻入地球軌道其人造衛星。
• 1993年：俄羅斯其總統鮑里斯·葉利欽使坦克去拍議會大樓，逼最高蘇維埃主席魯斯蘭·哈斯布拉托夫行出來投降。嚽就是莫斯科十月事件。

10月5號：

• 1789年：法國大革命：野価法國巴黎其女界着凡爾賽大遊行，抗議物價過懸，食其麵包過少。
• 1938年：納粹德國部隊佔領捷克其蘇臺德。
• 1989年：西藏流亡政府其領導人十四世達賴喇嘛得遘諾貝爾和平獎。
• 1991年：芬蘭其電腦工程師林納斯·托瓦茲發佈Linux（圖）其頭隻版本。

10月6號：

• 1928年：蔣介石當選中華民國其國民政府主席。
• 1930年：中原大戰：閻錫山其政府倒臺。
• 1973年：埃及共敘利亞齊派部隊去拍以色列，第四次中東戰爭（圖）爆發。
• 1976年：華國鋒告儂去拿江青、張春橋、王洪文、姚文元四隻儂（者四隻儂乞儂號𡅏四儂幫），中國其文化大革命結束。

10月7號：

• 1849年：美國作家埃德加·愛倫·坡着馬里蘭州巴爾的摩其蜀隻醫院裡勢生去。
• 1936年：中國共產黨其紅一、紅二、紅四三隻方面軍着甘肅其會寧會合，“萬里長征”結束。
• 1949年：德意志民主共和國敆蘇聯其保護下着東柏林成立，者國家一般乞儂號𡅏“東德”。
• 1976年：華國鋒（圖）接替生去其毛澤東，做中國共產黨中央委員會其主席。

10月8號：

• 1813年：天理教其領導人林清帶兵去拍北京其皇宮，滿清其皇子綿寧（之後其道光皇帝）帶兵反抗，最終將林清蜀陣儂拿起來。
• 1895年：朝鮮其明成皇后乞日本公使三浦梧樓暗殺。
• 1967年：出名其馬克思主義者切·格瓦拉（圖）乞玻利維亞政府軍拿𡅏刣囇。
• 2010年：中國儂劉曉波得遘諾貝爾和平獎。

10月9號：

• 768年：法拉克儂其國王查理曼登基。
• 1446年：朝鮮其世宗大王宣佈發明諺文字母表（圖）。今旦其朝鮮語大部分是獲者諺文寫其。
• 1740年：印尼其中國儂發動起義，乞荷蘭殖民政府鎮壓，着紅溪刣死一萬儂。滿清皇帝聽講以後無叕無緒。
• 2006年：美國其Google公司使16.5億美元收購Youtube。

10月10號：中華民國：國慶

• 1911年：中國同盟會敆武昌發動起義（圖），最終推翻滿清政府。遘尾了茲日乞中華民國定做國慶日。
• 1913年：巴拿馬運河起好。
• 1934年：敆瑞金其中國共產黨乞中華民國國民政府拍輸，開始走別塊去，者事計乞共產黨號𡅏「萬里長征」。
• 1945年：朝鮮勞動黨中央委員會成立。

10月11號：

• 1899年：川士瓦共和國共奧蘭治自由邦正式宣佈向英國開戰，第二次波耳戰爭（圖）爆發。
• 1951年：中國人民解放軍拍西藏，德格·格桑旺堆投降。
• 1954年：胡志明帶領越南獨立同盟會入河內，佔領北越。
• 2007年：YouTube着墨西哥正式上線。

10月12號：

• 前539年：波斯國王居魯士二世拍下巴比倫。
• 1492年：哥倫布其船隊登陸巴哈馬群島。伊也是頭隻發現美洲其歐洲儂。
• 1885年：滿清着臺灣建立蜀隻省。之前臺灣是屬福建省管其。
• 1960年：蘇聯領導人尼基塔·赫魯曉夫（圖）着聯合國大會懸頂盡去受氣，褪下自家其皮鞋大𢯾桌面。

10月13號：

• 54年：羅馬帝國其皇帝克勞狄乞伊老媽尤利亞·維普桑尼亞·阿格里皮娜毒死，尼祿（圖）上臺。
• 982年：遼國其蕭太后上臺。
• 1884年：格林威治時間正式乞儂規定是國際標準時間。
• 1949年：中華人民共和國其中國少年先鋒隊成立。

10月14號：

• 1066年：諾曼第公爵威廉一世着黑斯廷斯刣死英格蘭國王哈羅德·葛溫森。
• 1851年：路透着英國其倫敦開業。
• 1944年：納粹德國其元帥埃爾溫·隆美爾（圖）乞儂發現共暗殺阿道夫·希特勒其儂有干過，故此希特勒逼伊自殺。
• 1964年：列昂尼德·勃列日涅夫當選蘇聯共產黨中央委員會其書記。

10月15號：

• 1815年：法國皇帝拿破崙·波拿巴乞英國儂流放遘聖赫倫那，遘尾了死着夫塊。
• 1962年：蘇聯將導彈下遘古巴去，共美國差仂囝卜拍起去。嚽就是古巴導彈危機（圖）。
• 1984年：臺灣作家江南着美國乞臺灣政府告其黑社會其儂暗殺，嚽就是江南案。
• 2003年：中國頭隻載人飛船神州五號上天。

10月16號：

• 690年：唐朝其皇太后武則天（圖）登基，將國號改成“周”。伊也是中國歷史懸頂唯一蜀隻乞所有儂承認其女皇帝。
• 1843年：愛爾蘭數學家威廉·盧雲·哈密頓敆都柏林犖街其辰候發現四元數，將公式寫半墿中其蜀隻橋懸頂。
• 1846年：美國牙科醫生威廉·T·G·莫頓着動手術其辰候頭回使乙醚讓病儂𣍐疼。
• 1964年：中國頭隻原子彈着新疆爆炸。

10月17號：

• 前538年：波斯國王居魯士將猶太儂趁巴比倫放轉厝。
• 1831年：英國科學家法拉第發現電磁感應其現象。
• 1862年：滿清政府規定獲黃龍旗做滿清其國旗。
• 2003年：臺灣其臺北101（圖）起好。

10月18號：

• 1009年：耶路撒冷其聖墓教堂乞信伊斯蘭教其法蒂瑪哈里發國拆囇。
• 1860年：英國共法國其部隊佔領滿清其首都北京，將圓明園燒囇（圖）。
• 1867年：俄羅斯正式將阿拉斯加交乞美國。
• 1922年：BBC着倫敦成立。

10月19號：

• 前202年：第二次布匿戰爭：羅馬其將軍大西庇阿着扎馬拍贏漢尼拔其迦太基部隊。
• 1781年：美國獨立戰爭：美國共法國其部隊着約克鎮拍贏英國部隊，逼伊投降（圖）。
• 1812年：法國皇帝拿破崙·波拿巴其部隊離開俄羅斯其首都莫斯科。
• 1950年：朝鮮戰爭：中華人民共和國正式派志願軍去對手朝鮮民主主義人民共和國。

10月20號：

• 1945年：蒙古（圖）通過投票，正式獨立。
• 1962年：中國部隊拍印度，嚽就是中印邊境戰爭。
• 2003年：中國其《中國電腦報》頭回向中國儂介紹維基百科。
• 2011年：利比亞其獨裁人物穆阿邁爾·卡扎菲乞儂刣死。

10月21號：

• 1520年：葡萄牙儂斐迪南·麥哲倫發現麥哲倫海峽。
• 1879年：美國科學家愛迪生發明電燈（圖）。
• 1949年：中華人民共和國其中央人民政府政務院成立，遘尾了改名號𡅏國務院。
• 1983年：國家度量衡大會重新規定1米其定義：光敆真空臺中着1/299792458秒裡勢行其距離。

10月22號：

• 794年：日本其桓武天皇將首都搬遘平安（今旦其京都），嚽會中算平安時代其開始。
• 1633年：明朝其水軍着金門附近拍贏荷蘭其部隊。
• 1949年：蘇聯宣佈成功研究出自家其原子彈。
• 1964年：加拿大設計出新其國旗。（圖）

10月23號：

• 1856年：英國派部隊拍滿清其廣州，第二次鴉片戰爭正式爆發。
• 1911年：意大利着共土耳其其戰爭臺中頭回使遘飛機。
• 1956年：匈牙利其布達佩斯發生抗議示威，乞警察鎮壓。嚽就是匈牙利十月事件。
• 2001年：蘋果公司設計其iPod（圖）正式開始賣。

10月24號：

• 1851年：英國天文學家威廉·拉塞爾發現天王星其衛星天衛一共天衛二。
• 1860年：滿清將九龍割乞英國。
• 1861年：美國頭隻跨北美洲大陸其電報收發成功。
• 1945年：美國、英國、中國、蘇聯、法國簽訂《聯合國憲章》，聯合國（圖）正式成立。

10月25號：

• 1864年：太平天國其幼天王洪天貴福着江西乞滿清部隊拿去。
• 1961年：美國共蘇聯其坦克敆柏林其查理檢查站（圖）對峙，這嚽以後西德共東德其關係野緊張。
• 1971年：聯合國通過2758號決議，將中華民國（臺灣）逐出聯合國，伊其席位乞中華人民共和國政府奪去。
• 2001年：美國其微軟公司發佈Windows XP操作系統。

10月26號：

• 1597年：朝鮮王朝其將軍李舜臣敆鳴梁海峽（着今旦大韓民國全羅南道）附近拍贏日本其水軍。
• 1909年：日本其前首相伊藤博文着中國其哈爾濱乞韓國儂安重根暗殺。
• 1955年：越南共和國着越南南部其柴棍（今旦其胡志明市）成立，吳廷琰（圖）當選總統。
• 1979年：大韓民國總統朴正熙乞儂暗殺。

10月27號：

• 1275年：今旦荷蘭其首都阿姆斯特丹建立。
• 1682年：費城建立。
• 1927年：中國共產黨着江西其井岡山建立伊其“革命根據地”。
• 1930年：臺灣賽德克族其頭頭莫那·魯道敆霧社發動反對日本統治其起義，最終失敗。嚽就是霧社事件（圖）。

10月28號：

• 312年：羅馬帝國皇帝君士坦丁一世將馬克森提烏斯滅囇，重新統一羅馬。
• 1886年：法國送乞美國其自由女神像着紐約起完工，總統格羅弗·克利夫蘭遘塊主持。
• 1922年：意大利其國家法西斯黨向羅馬進軍（圖），遘尾了這黨其領導人本尼托·墨索里尼變成意大利其首相。
• 1962年：蘇聯領導人尼基塔·赫魯曉夫宣佈將着古巴其導彈下轉厝，古巴導彈危機結束。

10月29號：

• 1675年：德國數學家萊布尼茨頭回挈“∫”這符號做積分其標誌。
• 1863年：國際紅十字會（圖）着瑞士其日內瓦成立。
• 1956年：以色列拍埃及其西奈半島，第二次中東戰爭爆發。
• 1958年：蘇聯作家鮑里斯·帕斯捷爾奈克着伊國際其國內壓力之下，無能耐宣佈伓挃自家得遘其諾貝爾文學獎。

10月30號：

• 637年：阿拉伯帝國佔領安條克。
• 1905年：俄羅斯皇帝尼古拉二世正式頒佈這國頭部憲法，成立國家杜馬。
• 1960年：英國醫生麥可·伍德羅夫成功做成世界懸頂頭隻腎移植手術。
• 1961年：蘇聯其氫彈“沙皇炸彈”（圖）成功爆炸。嚽是歷史懸頂威力最大其蜀隻炸彈。

10月31號：

• 474年：西羅馬帝國最後蜀隻皇帝羅穆路斯·奧古斯都登基。
• 1517年：德國神學家馬丁·路德着維滕貝格其蜀間教堂門口貼伊寫其《九十五條論綱》，這事計會中算新教其宗教改革運動其開始。
• 1941年：美國拉什莫爾山懸頂雕好四隻總統其像：喬治·華盛頓、湯瑪斯·傑斐遜、西奧多·羅斯福共亞伯拉罕·林肯。遘尾了這山乞儂號𡅏“總統山”（圖）。
• 2011年：聯合國人口基金會着茲日宣佈，世界其總人口已經超過70億。