莆仙語

wikifunctions:Z1903

莆仙語
Beông-dā̤-uā/本地話
國家 / 地區	中國福建、臺灣烏坵
主要區域	中國福建莆田共仙遊，臺灣烏坵
講其人口	差不多500萬
系屬	漢藏語系 漢語族 閩語 莆仙語
文字	漢字 興化平話字
官方地位
官方語言	無
管理機構	無
語言代碼
ISO 639-1	zh
ISO 639-2	chi (B) zho (T)
ISO 639-3	cpx
莆仙話通用其範圍（黃色）

莆仙語（興化平話字：Pô-sing-gṳ̂），也號𡅏興化語、興化語、莆仙方言、莆仙片等等，是莆田儂其母語，使其儂差不多有500萬，主要分佈着中國其莆田共仙遊，臺灣其烏坵也是使莆仙話其。講自家總款其母語號𡅏本地話。莆仙話自家其文字號𡅏“興化平話字”，但是共福州話其平話字差野遠，是19世紀其辰候基督教傳教士參考福州話平話字共閩南話白話字來發明其。

共其他漢語變體蜀樣，莆仙話其歸屬有爭議，有其專家認為是蜀種漢語方言，有其專家認為是獨立其語言。着中華民國，伊其官方名字號做興化語或者莆仙語。莆仙話共其他閩語都是趁原始閩語發展來其，故此儂家會發現伊共其他閩語有盡価共同點。

原始閩語是上古漢語吸收在地其閩越語以後，大概敆4世紀其辰候演變發展來其。莆仙話是閩南話共福州話接觸以後形成其。中國大陸其專家一般認為閩方言其蜀種漢語方言；莆仙話是閩方言其蜀種次方言，號𡅏莆仙方言，正式其名字是閩語莆仙區，今旦復改名閩方言區莆仙片。不過國際語言學原則上互相聼𣍐會意其話應該當着認定做語言，儷仈講普通話其儂完全聽𣍐會意莆仙話，按總款來講其話莆仙話是算蜀種語言，伓是方言。世界少數民族語文研究院（SIL International）下底其網站民族語（Ethnologue）將其認定做漢語族下底獨立其語言。ISO 639-3認為漢語是蜀種「大語言」（macro language），莆仙語共其他漢語變體都是漢語下底其成員。