琉球國

"琉球國" 是蜀篇漢字其文章，卜覷平話字版本"Liù-giù-guók"，篤嚽塊。

琉球國
琉球國 / ルーチュークク
← ← ← 1350年—1879年 →
國旗 國徽
自然地理 （實際控制）
首都	首里
面積
-1571年：	3,454 km2
-1611年：	2,223 km2
人民生活
官方語言	沖繩語
通用語言	沖繩語、八重山語、宮古語、與那國語、今歸仁語、奄美語
人口
-1632年：	108,958儂
-1729年：	173,969儂
-1879年：	286,787儂
政治文化
政治制度	君主制
琉球國中山王
-1429年 - 1439年：	尚巴志
-1477年 - 1526年：	尚眞
-1587年 - 1620年：	尚寧
-1848年 - 1879年：	尚泰
經濟實力
貨幣單位	鳩目錢
歷史大事
歷史大事
-1350年：	統一
-1609年：	乞日本侵略
-1879年：	乞日本滅囇

琉球國（沖繩語：ルーチュークク）是蜀隻舊底其國家，敆現在日本沖繩縣共鹿兒島縣其奄美群島。

琉球著台灣共日本之間，舊底向中國朝貢。1609年，日本其薩摩藩侵略琉球，強迫琉球也向伊朝貢。1879年，琉球乞日本滅唻，改名號𡅏沖繩縣。

琉球共福州其關係野深，今旦台江固有琉球館，舊底是掏𡅏住琉球儂其。

歷史

根據琉球官方寫其歷史書《中山世鑑》、《中山世譜》共《球陽記事》裏勢其講法，琉球群島是由女神阿摩美久創造其。遘尾了阿摩美久其大囝變成琉球最早其國王，號𡅏天孫氏。天孫氏傳15隻國王，乞儂篡位，全國大亂。1187年，由浦添其按司舜天統一琉球。

舜天王朝傳遘第3代，讓位乞丞相英祖。英祖王朝傳遘第4代國王玉城其辰候，琉球分成3隻國家，號𡅏中山、南山共北山，玉城儷統治最強大其中山。1349年，中山王西威死咯以後，浦添其按司察度上臺。1372年，派儂向明朝朝貢，1392年，明太祖派閩人三十六姓去琉球，對手夫塊其發展。茲蜀陣儂都住著久米村裏勢，對琉球其外交貢獻野大。

1406年中山國王武寧乞南山其蜀隻將軍尚巴志逐落臺，尚巴志讓伊郎爸尚思紹做國王，建立第一尚氏王朝。尚巴志著1429年滅三國，統一其琉球國就總款成立了。

15遘16世紀是琉球其黃金時期，許辰候其琉球野富，共中國、朝鮮、泰國等等國家都有做生意。1469年，國王尚德乞大臣尚圓篡位。者尚圓建立第二尚氏王朝。琉球著尚圓其囝尚眞手𡅏最強大，拍下八重山共宮古。伊其囝尚清在位其辰候，復拍下奄美群島，茲辰候其國土面積最大。日本發動侵略朝鮮其壬辰倭亂其辰候，琉球特零意對手明朝共朝鮮。1609年，日本報復琉球，派部隊去拍，將國王尚寧拿去，嚽就是歷史裏勢其己酉倭亂。2年以後因為會驚明朝，復將尚寧放轉去。但是日本將琉球其奄美群島奪去，復派部隊監視內政，者嚽以後琉球實際已經變成日本其附庸去了。

1871年，琉球其船因為風颱漂遘台灣，坐著船裏勢其乞台灣原住民刣死。日本借者事計拍台灣，逼滿清承認嚽是「保民義舉」。第二年，日本就挈嚽講滿清承認「琉球是日本其」，單方面將琉球降做伊自家其蜀隻藩。琉球國王尚泰派儂去東京抗議，日本儂乍無察伊。尚泰復派儂去中國滿清政府夫塊告狀，最終日本儂肝火棕去，敆1879年將琉球滅囇。

許辰候大部份其琉球儂對日本統治盡去不滿，日本其明治天皇會驚伊各儂反抗，將尚泰共伊其家族都綁架遘東京去住。野価反對日本其琉球儂都走去中國，有其敆北京，有其敆天津，有其敆福州。伊各儂卜想讓中國出兵去拍日本，著總理衙門夫塊剃了講剃了講。1894年甲午戰爭爆發其辰候，茲蜀陣儂勸滿清去拍琉球，滿清皇帝無聽。聽講滿清共日本發生戰爭，反對日本其琉球儂都野歡喜，倚望滿清其部隊來「解放琉球」，結果部隊連影都無。最終滿清拍輸去，將臺灣割乞日本，琉球獨立也無希望了。來中國其琉球儂也見覺無解數，無箬恒就都轉厝了。

政治

琉球最高其統治者號𡅏國王，琉球儂告伊「御主加那志」或者「首里天加那志」。王后有佐敷間切其封地，號𡅏「佐敷按司加那志」。太子號𡅏「黃金加那志」，復因為有中城間切其封地，號𡅏「中城御殿」。

琉球最大其官是攝政，儷由王子來做，不過伊儷管禮儀，無權。實際最大其官是三司官，復號𡅏法司，相當中國其丞相。者官𣍐使由王族其儂來做。再下是表十五人，相當中國六部其部長。

軍事

琉球無正式其部隊，不過有自家其自衛武裝組織。1554年，經過國王尚清其改革，正式確定武裝組織其「庫理・ヒキ制度」。

琉球著首都首里附近設12隊ヒキ，蜀隊廿幾隻儂。ヒキ是國王其衛隊，平均分成3組，3隻三司官蜀儂管蜀組，每蜀組4隊。

北山設北山監守其單位，管蜀隻幾百儂其部隊，住著今歸仁城。

其他其地方由當地其間切官員自家設民兵組織來維持治安。

行政單位

琉球囫圇國分「三省三十六島」。「三省」是指沖繩島其中山、南山共北山3隻部份，正式名稱號𡅏中頭方、島尻方共國頭方，者三省其地區就是三山時代3隻國家七領土；「三十六島」是指宮古、八重山、與那國、奄美等等琉球下底其島。

實際「三省三十六島」著琉球行政區域裏勢是虛其講法，琉球透底無設省級其官員共行政機構。琉球實際最高其行政單位是間切，著省級其下底，復號𡅏郡或者府。首里三平等、那霸、泊共久米一般齊號𡅏「4府」，無算著間切裏勢。

間切下底是村，是最低其行政單位。

身份制度

琉球其身份制度著1509年確定，遘尾了法律化，分9品18階。

琉球最懸其是王族，無著9品18階裏勢，乞儂號𡅏御殿。王族分王子共按司2種，其中王子是國王其囝。

高級士族其官位趁正一品遘從四品，號𡅏侍或者良人。高級士族其官位有親方共親雲上2種。

一般士族是指正五品之下其士族。一般士族其官位有里之子親雲上、筑登之親雲上、里之子、里主、筑登之、子、仁屋7種。

一般士族分里之子筋目共筑登之筋目2種。里之子家族成員其升官順序是：子、里主、里之子、里之子親雲上，再懸就是高級士族其親雲上；筑登之家族成員其升官順序是：子、里主、筑登之、筑登之親雲上，再懸也是親雲上。

高級士族共一般士族都有家譜，號𡅏持系，意思是「有家譜其」。百姓無家譜，號𡅏無系。也有百姓有功勞，升去做士族，號𡅏新參士族。新參士族最低其官位是仁屋。

經濟

琉球國家領土野嫩，無能耐發展農業做基礎其經濟，儷有辦法通過對外貿易得遘錢財。琉球向中國朝貢，得遘野価物資；伊其地理位置重要，故此變成日本共東南亞國家對中國貿易其「總代理」。

琉球向中國出口日本其白銀、漆器、刀劍、屏風共蒲扇，將中國其中藥、瓷器、絲綢、銅錢賣遘日本共朝鮮，復將東南亞、印度共阿拉伯國家其犀牛角、蘇木、香料、錫、糖、象牙等等其乇賣去中國、日本共朝鮮。琉球著許辰候趁轉口貿易裏勢趁野価錢，乞儂號做「萬國津樑」，意思是幾乎所有卜想做對外貿易生意其儂都會由伊嚽塊行。

不過，遘1609年日本侵略琉球以後，禁止琉球共朝鮮、東南亞等等國家做生意。琉球向中國進貢得遘其乇大部份乞日本奪去，琉球罔變罔逼。經過向象賢（羽地朝秀）共蔡溫兩隻儂其努力，經濟乍開始有仂囝好。不過，遘19世紀，復開始變逼，餓死野価儂，琉球國王想野価方式去救，都無能耐解決。

錢

琉球最早無貨幣。1413年，明成祖送乞琉球「永樂通寶」其錢。趁許辰候開始，琉球使銅錢。

琉球有做過幾種自家其銅錢，包括尚泰久做其大世通寶，尚德其世高通寶，尚圓其金圓世寶共尚眞其中山通寶。趁1656年開始，琉球挈鳩目錢做貨幣。者鳩目錢質量野ngiák，儷著伊自家國家𡅏使。

除去自家其錢以外，琉球也使中國其洪武通寶、永樂通寶，共日本其寬永通寶。

法律

琉球其法律分死刑共輕刑2種。其中，死刑分淩遲、刣頭、槍刺3種。淩遲專門掏來刣卜想造反其儂。槍刺是將犯儂縛著十字架懸頂，挈槍gék心臟刣死，仱再將頭砍唻。輕刑分流放、曝日頭、夾、枷（帶枷鎖遊街）、笞（挈索拍）。

琉球儂性格比較平直，故此法律比較簡單，囫圇國都無設法院。儷是有案件，就向三司官告狀，由三司官來判。

文化

琉球音樂

空手道

琉球國受遘中國、日本2隻國家文化其影響，但是琉球有自家特色其文化。

著1537年遘1623年之間，琉球編過歷史懸頂頭部其琉歌集，號𡅏「Omoro sōshi」（おもろさうし）。其中，「Omoro」著琉球語裏勢是「歌」其意思。「Omoro sōshi」裏勢有琉歌1554題。

17世紀其辰候，抒情其琉歌特流行。琉歌最稠其樣式是8、8、8、6總款其30音樣式，共日本其和歌真像。

琉球儂使一種名字號做「三線」其琴。者三線是由中國其三弦發展來其，遘尾了傳遘日本其九州，發展成「三味線」。

琉球其工藝受遘福建真大其影響，琉球漆器就是趁福州其脫胎漆器發展來其。

明朝其辰候，閩人三十六姓將中國武術帶遘琉球，發展成琉球自家其武術「tii」（ティー），最尾發展成今旦其空手道。

醫學共技術

琉球其醫學受遘福建其影響。舊底野価日本其醫生經過琉球去福建學習，有其醫生因為風颱無能耐去福建，就留著琉球。比較出名其是專門乞尚寧看病其醫生山崎二休。

琉球歷史裏勢有野価出名其醫生，其中真価儂有去中國留學過。《球陽記事》裏勢講，琉球派過儂去福州學內科、外科、治天花等等其醫療技術。1846年，琉球醫生仲地紀仁向傳教士Bernard Jean Bettelheim學種珠（種牛痘）治天花其方法。

1787年，琉球儂飛安里發明一架飛機。

宗教

御嶽

琉球儂信琉球神道、日本神道、佛教共道教，以後也有儂信基督教。

琉球神道是琉球儂本底自家其宗教，包括拜祖宗、信御嶽、信Niraikanai（ニライカナイ）、信Onarigami（おなり神）等等。按琉球神道其講法，儂死去以後會去Niraikanai裏勢去，變成一隻保佑家庭其神。者神會定期轉自家厝𡅏去覷一覷，保佑家庭平安。故此琉球儂共中國儂一樣，會供死其祖宗。琉球儂特別信山水共森林其神，嚽就是御嶽信仰。琉球儂也共福建一樣信土地公，琉球儂告伊「tudiikuu」（トゥティークー）。

著琉球神道裏勢，女界其地位野懸。琉球神道其祭司號𡅏Noro（ノロ），民間其巫師號𡅏Yuta（ユタ）。全國最高其Noro是聞得大君，一般由國王其姐妹或者老媽來做。

佛教差不多敆13世紀其辰候傳遘琉球。圓覺寺、天王寺共天界寺齊號𡅏「琉球三大寺」，但是著第二次世界大戰其辰候，日本儂起軍事基地著嚽塊，最終茲三隻寺全部都乞美國飛機炸散斗了。

琉球儂也信道教，有拜祖宗共硩紙其習慣。像拿公、拿婆、臨水奶、陳尚書共媽祖總款福建其道教神，都有琉球儂起廟來拜。

1622年，頭隻基督教傳教士來琉球其八重山傳教。1844年，法國傳教士Théodore-Augustin Forcade來琉球，伊是頭隻遘沖繩島傳教其儂。1846年，英國儂Bernard Jean Bettelheim來沖繩傳教，著嚽塊學習沖繩語，伊是世界懸頂頭隻挈沖繩語翻譯《聖經》其儂。

國王列表

琉球國王列表

圖	平話字	漢字	在位
Shunten王朝
	Shunten	舜天	1187–1237
	Shunbajunki	舜馬順熈	1238–1248
	Gihon	義本	1249–1259
Eiso王朝
	Eiso	英祖	1260–1299
	Taisei	大成	1300–1308
	Eiji	英慈	1309–1313
	Tamagusuku	玉城	1314–1336
	Seii	西威	1337–1354
Satto王朝 中山國王
	Satto	察度	1355–1397
	Bunei	武寧	1398–1406
Haniji王朝 北山國王
	Haniji	怕尼芝	1322?–1395?
	Min	珉	1396?–1400
	Hananchi	攀安知	1401?–1416
Ofusato王朝 南山國王
	Ofusato	承察度	1314–1398
	Oueishi	汪英紫	1398?–1402
	Ououso	汪応祖	1403?–1413
	Tafuchi	達勃期	1413?–1414?
	Taromai	他魯毎	1414?–1429
第一尚氏王朝 琉球國中山王
	Siông Sṳ̆-siêu	尚思紹	1407–1421
	Siông Bă-cé	尚巴志	1422–1439
	Siông Dṳ̆ng	尚忠	1440–1442
	Siông Sṳ̆-dăk	尚思達	1443–1449
	Siông Gĭng-hók	尚金福	1450–1453
	Siông Tái-giū	尚泰久	1454–1460
	Siông Dáik	尚徳	1461–1469
第二尚氏王朝 琉球國中山王
	Siông Ièng	尚円	1470–1476
	Siông Sŏng-ŭi	尚宣威	1477
	Siông Cĭng	尚眞	1477–1526
	Siông Chĭng	尚清	1527–1555
	Siông Nguòng	尚元	1556–1572
	Siông Īng	尚永	1573–1586
	Siông Nìng	尚寧	1587–1620
	Siông Hŭng	尚豊	1621–1640
	Siông Hièng	尚賢	1641–1647
	Siông Cék	尚質	1648–1668
	Siông Dĭng	尚貞	1669–1709
	Siông Iáh	尚益	1710–1712
	Siông Géng	尚敬	1713–1751
	Siông Mŭk	尚穆	1752–1795
	Siông Ŭng	尚温	1796–1802
	Siông Sìng	尚成	1803
	Siông Hô̤	尚灝	1804–1828
	Siông Ṳ̆k	尚育	1829–1847
	Siông Tái	尚泰	1848 – 1879

再看

• 琉球
• 沖繩縣
• 琉球獨立運動