教會羅馬字

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

教會羅馬字是指的19世紀中期遘20世紀初其辰候西方基督教傳教士替漢語族語言發明其各種羅馬字。除開閩南語其白話字以外，茲蜀類羅馬字一般儷敆教會裡勢使，故此號𡅏「教會羅馬字」。

許辰候南方各地其儂一般儷仈自家其「方言」，𣍐曉官話（漢語），也看𣍐會意漢字。故此傳教士就發明各種「教會羅馬字」來傳教。者羅馬字發明以後，信基督教其儂罔變罔価，嚽都是伊其功勞。今旦其語言學學者野容易趁教會羅馬字裡勢瞭解許時候其讀音，研究出語言敆者100年臺中其變化，嚽比舊底使其漢字音韻書會簡單野価。

中華民國上臺以後，強迫中國儂儷中使漢字，禁止各地使「教會羅馬字」來寫字。中華人民共和國成立以後，復做「推廣普通話」其運動，拍壓各種「漢語方言」，野価南方儂共「兩個聲」蜀樣𣍐仈講自家其母語，就伓使講會寫羅馬字了。野価儂敆政府影響之下見覺者教會羅馬字是「西方帝國主義侵略其產物」，特零意伓去學伊。像今旦閩東語福州話其平話字，野価福州儂連聽都無聽過。教會羅馬字裡勢保護最好其閩南語白話字，雖然講國外野価儂固敆𡅏使，敆中國其閩南野価儂也是𣍐曉有者乇。