黑嘴端鳳頭燕鷗

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

黑嘴端鳳頭燕鷗（學名：Thalasseus bernsteini），也號𡅏中華鳳頭燕鷗或黑嘴鳳頭燕鷗，是燕鷗科其蜀種海鳥。大概長40釐米。喙黃色，但是尖尖是烏其。食魚，食蝦。求偶其時候會舒開頭懸頂其毛，盡像戴了鳳冠。每蜀年6月遘8月生卵。

住其地方

黑嘴端鳳頭燕鷗是蜀隻極危物種。只種鳥一般共與別種燕鷗敆蜀堆生活，遘敆中國大陸共臺灣其海岸可能故會發現。

仈曾大家都以爲已經絕種了，告伊「神話之鳥」。但是敆山東北勢其海岸、闽江口、菲律賓、泰國、印尼、砂拉越，都有儂講看見過伊。1998年，臺灣南勢其八掌溪有儂發現黑嘴端鳳頭燕鷗敆𡅏遷徙。

仱遘1999年，有儂敆馬祖列島其中島懸頂發現，第一少有蜀頭黑嘴端鳳頭燕鷗覭着野価頭大鳳頭燕鷗臺中。2000年，敆同蜀隻島，蜀麇大鳳頭燕鷗旁邊復發現了4頭大鳥共4頭鳥囝。儂都講，只種鳥囝卵乞掏去恰価，故此慢慢變少。這鳥有能涯敆馬祖存活，可能因爲舊底嚽所是軍事禁區，別儂伓好裡。敆馬祖發現以後，當地政府劃了燕鷗保護區。

也是2000年，八掌溪復有儂看見只種鳥遷徙。2004年，敆浙江韭山列島，復發現另蜀隻繁殖地。2014年6月，澎湖縣野鳥學會敆澎湖玄武岩自然保留區雞善嶼復發現了只種鳥，後首嚽所乞確認也是繁殖地。

保護

只種鳥敆全世界伓超過50頭。2012年，世界自然保護聯盟將伊列裡「全球最瀕危其100隻物種」。

文化

2000年發現黑嘴端鳳頭燕鷗，馬祖也出名了。馬祖當局將黑嘴端鳳頭燕鷗定為「縣鳥」，希望儂都去客佻。故做了有這鳥囝圖案其指墿其牌牌、路燈。福澳港裡口、機場到站出口、馬祖風景管理處等等地方，也有只種鳥其形象。起廟其時候，也有使遘只種鳥。譬喻講南竿鄉牛峰境五靈公廟其飛簷懸頂，就做了黑嘴端鳳頭燕鷗其形狀。北竿鄉坂里天后宮其參道邊兜，石燈籠也做成黑嘴端鳳頭燕鷗其樣式。