閩劇

"閩劇" 是蜀篇漢字其文章，卜覷平話字版本"Mìng-kiŏk"，篤嚽塊。

閩劇，也號𡅏福州戲，是福州特色其蜀種劇種，使福州話唱，福州話念白。

歷史

舊底其閩劇海報

敆唐朝其辰候，福州就有「歌舞百戲」其演出去了。南宋辰候南戲臺中其《張協狀元》，就是獲福州百姓其「福州歌」共「福清歌」來做曲牌其。

明朝萬曆37年（1609年），福州出身其官員曹學佺乞皇帝逐轉厝。伊着洪塘祖厝組織戲班，請儒士去夫塊聽劇。伊精通音律，創作出來蜀種適合使福州話唱其腔，別儂都見覺者腔𣍐呆，告嚽號𡅏「儒林班」。滿清入關以後，曹學佺自殺，者腔就慢慢無儂唱去了。

同時復有江西其弋陽腔傳遘福州來。者戲班蜀七處躃躃動去演出，故此號𡅏「江湖班」。者「江湖班」唱戲全使「土官話」（官話其字使福州話其音來讀），前臺唱，後臺幫腔，鑼鼓窾窾叫，聽𡅏野鬧熱，百姓都盡去喜歡。但是者「土官話」着百姓臺中無箬壞儂聽會會意，有儂就掏𡅏「平話」（福州話）來唱白，「平話戲」就總款產生去了。滿清咸豐年，洪塘其老儂懷念舊底其「儒林班」，借做半段唱戲其機會，組織頭隻使鄉其名字起其戲班，號𡅏「洪塘儒士班」。由茲辰候起，「儒林戲」復開始有儂唱去了，並且唱其儂罔變罔多，戲派罔變罔価。由鄉下傳遘城裡，復由福州傳遘長樂、福清、永泰、古田、閩清等等其地方，敆各塊也是野受歡迎。最尾「儒林戲」、「江湖戲」共「平話戲」會變合蜀堆去了，百姓告伊「三合響」，嚽就是今旦其閩劇了。

中華民國成立以後，閩劇其發展罔變罔成熟。舊賽樂，新賽樂，三賽樂，善傳奇，賽天然，慶樂然是許辰候有特色其戲班，敆福州儂臺中有「三樂一旗兩頭羊」其講法。許滿価其名家臺中，固是算鄭奕奏最出名。伊着短短幾年時間臺中，塑造出來《新茶花》裡勢其「新茶花」，《百蝶香柴扇》裡勢其「林英姐」，《黛玉葬花》裡勢其「林黛玉」等等形象，乞儂號𡅏「閩劇泰斗」。

中國共產黨乍上臺其辰候，鼓勵閩劇其創作。遘尾了文化大革命開始，唱閩劇其都乞毛澤東逐去「上山下鄉」。雖然講現在政府開始保護閩劇，無年呆會聽福州話其後生囝罔變罔少，愛聽閩劇其大部分是老儂，故此講閩劇有失傳其危險。

特色

唱腔共樂器

閩劇使其樂器

閩劇其唱腔分「江湖調」，「洋歌調」，「逗腔」共「小調」茲幾種。

「江湖調」聲調高昂，字価腔少，一泄而盡。《江湖疊》，《柴牌調》，《陰調》都是者調比較稠使其曲牌名。

「洋歌調」主要其曲牌會中分「大介大牌」，「中介大牌」，「大介盤答」等等擊中。蜀隻儂唱號𡅏「大牌」，兩三隻儂唱號𡅏「盤答」。「大介」，「中介」共「小介」其區別着「起介」（開頭其鑼鼓）夫塊。

「逗腔」有15種板調，臺中其轉折共結尾有野価其「唉」，「伊」茲蜀類虛腔。主要其曲牌有《自掏嶺》，《寬板》，《急板》等等。

「小調」都是閩劇其樂曲，是平常講其福州話來唱，《西湖亭》，《琵琶怨》共《新茶花》都是茲蜀類其閩劇。

閩劇其曲牌大部分是由弋陽腔，四平腔，徽劇共崑曲發展來其。「一唱衆和」其幫腔共「夾滾」，就是由弋陽腔裡勢學來其。

閩劇其介頭（拍鑼鼓）由「江湖調」，「平講戲」，「逗腔」共「十番」其鑼鼓介頭發展來其。武場吸收去野価京劇其鑼鼓經，不過有仂囝𣍐蜀樣。

閩劇其樂器有簫，啲咑，二胡，椰胡茲蜀類管絃樂器，共鑼，鼓，鈸，磬茲蜀類拍擊樂器。

角色行當

傳統其閩劇裡勢一般僅有7隻儂，號𡅏「七條椅」。

最早閩劇僅有生，旦，丑3種角色，號𡅏「三小戲」。遘尾了慢慢增加，最尾加遘今旦其「十二角色」：老生，小生，武生，青衣，花旦，老旦，大花，二花，三花，貼，末，雜。

劇本

閩劇其大部分劇本是使漢字來寫其，僅是觸着無塊討其或者𣍐仈着蔣寫其漢字，就獲近音其字來替。

閩劇共福州文化

閩劇吸收野価童謠歌、俗語、諺語、典故，對福州其語言共文化影響野大。像閩劇《貽順哥燭蒂》，就是根據福州商儂馬貽順其故事編其。現在福州儂使「貽順」者詞來罵儂奸狡利，就有受閩劇其影響。

外斗連接

福建閩劇網 (中文)