若早會意男界也會乞性侵

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

《若早會意男界也會乞性侵》是蜀隻影片，宣傳性別倛平等。製作單位是中華民國國家教育研究院。只隻影片由陳北川來導演，傳愛工作小組寫劇本，敆臺灣雞籠䀹。影片講了總款蜀件事計：蜀隻號𡅏依瑋倛男學生碰著蜀隻號杰哥其男界，乞伊逼迫侵犯去了。影片公佈之後，乞儂掏七處傳，網民對只隻影片反響野大。

製作

《若早會意》由中華民國教育部託國家教育研究院去做，傳愛家族傳播文化事業有限公司接去了只隻任務。導演倛儂是陳北川。2010年，遘雞籠影影片，取景倛場地有暖暖高級中學、新豐街等等。主題歌倛歌詞由傳愛創意小組寫。馬路大譜曲。

劇情大綱

有蜀回，依瑋（演員黃耀緯）共外媽兩隻大爭，依瑋就離開伊厝，共伊客佻幫彬彬（演員黃韶麒）去網絡咖啡廳客佻。兩隻儂敆網咖裏勢，乞杰哥（演員伍嘉緯）注意了。行出網咖後，杰哥來攀講。「我厝裏勢有野価乇食」「幫助過野価逃厝少年」——杰哥總款講伊各儂聽，騙伊各儂去自家厝裏勢客佻。杰哥帶兩隻儂去超市買乇，趁機帶了幾罐啤酒轉厝。敆厝裏勢，杰哥灌兩隻儂食酒，等遘彬彬醉了，卜去侵犯依瑋。雖然依瑋大聲告「杰哥伓使！」，但是杰哥哼喝「聽喙，讓我覷囇！」遘尾得逞，固逼迫依瑋𣍐使將茲件事計講儂聽。過後，依瑋身心野受治。伊去公園躒，碰著志工媽媽淑惠（演員張昌緬）共儂碎講碎聽。淑惠講遘共性侵犯有關倛詞彙，依瑋癲去，喊叫連天，就乞淑惠注意了。依瑋受伊幫助，講了自家倛事計，復聽淑惠倛話，準備報警、驗傷、通報學校，讓全案進入司法程序。影片最後，由旁白講清楚性侵害倛定義。

反響

《若早會意》2013年乞儂上傳遘網絡（一說2012年），因主角杰哥、依瑋演技野真，而網民見覺劇情套文、可笑，野価儂都來討論嚽。影片遘2013年7月點閱率近80萬，破了民國政府單隻宣導片倛紀錄。遘2014年6月，已經有了200萬次以上倛點閱。影片部分臺詞，比如講「如果早知道……」（若早會意……）、「杰哥，不要啦」（杰哥，伓使啦），等等，也變成了網絡流行語。网民也將茲隻影片掏去改作各種版本。

但是《若早會意》也乞儂批評了，理由是嚽缺乏教儂性別平等倛功能。「愛與和平與幹」成員李佳霖寫文章講，茲隻影片不但無教學倛功能，且固加深總款倛刻板印象——年長男同性戀者會誘騙、侵害少年，復講嚽強化了愛滋感染者共性侵犯受害者兩隻倛連結，扼殺青少年倛性慾實踐。

影片乞掏七處傳，演杰哥倛伍嘉緯故此也走紅。有儂按影片裏勢簡訊倛電話號碼討著杰哥。有儂也會去伊厝，約伊演杰哥。