東山奈央

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

敆T-SPOOK 2016䀹其相

東山奈央（1992年 3月11號 –  ），日本儂，女界，是配音演員，也是歌手。血型A型，由日本播音演技研究所研修科畢業。現刻時敆INTENTION工作。

經歷

東山做細細起，就敆雙語環境裏勢生活。伊郎罷是由海外轉遘日本其，平常都講英語。伊娘奶講其是日本話。伊敆總款其環境裏勢生活，故此英語野霸。伊敆初高中一貫制學校裏勢讀書。伊讀初二其時候，有蜀隻同學，以後想做聲優——也就是配音演員。東山仈轉之後，自家也想試蜀試，就按臺詞乞蜀部作品配了音。配音之後，伊發現做聲優盡去野有味，就立下總款其目標。遘高中其時候，伊同時去日本播音演技研究所，學習聲優其本事。修習畢業之後，加裏ARTSVISION事務所。伊學業共事業都有花心思，考大學其時候也都合格。

2010年10月，電視動畫《僅有神會仈其世界》共《STAR DRIVER 閃亮其塔科特》開始播放。東山敆前蜀部動畫乞中川加儂配音，敆後蜀部乞スガタメ・タイガー配音。嚽就是伊正式其成藝。《僅有神會仈其世界》作者若木民喜敆Twitter評論選用東山奈央茲蜀件事計其時候總款講：「做動畫，就著讓新人配偶像角色了哇。」。

2014年4月1號，東山離開ARTSVISION。茲蜀年5月1號，加裏鈴村健一設立其事務所——INTENTION。

2016年11月17號，東山宣佈成藝做歌手，並且開設了官方網站共Twitter、LINE帳戶。