鬅客文化

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

倫敦客佻鬅客其儂。頭髮罔染做原色其時尚風潮也號𡅏鬅客

鬅客文化（英語：punk rock），是1970年代開始有其次文化。者文化，第一開始出現着音樂界，號𡅏鬅客搖滾。接下變成包括音樂、衣裳、個人意識主張其文化風格，含義比起原底故大去。

內容

音樂

主條目：鬅客搖滾

設計

第一開始其時候，做鬅客衣裳其儂，愛乞平常稠稠看見其乇加添美學其價值。譬喻講衣裳扯破去，介使別針掏扣起，或且綁帶掏綁起；使顏料着衣裳懸頂畫畫、裝飾；掏烏黜黜其糞掃袋做汗衫或且裙，將別針、剃喙鬚其刀等等掏來做裝飾。伊各儂故稠稠特神意使皮革、橡膠、乙烯基塑料做衣裳，讓儂想遘犯事、性暴力、性變態。反正就是讓自家其樣式野誇張、放蕩不羈、充滿挑釁性。

雖然講鬅客看過去好像做其盡霸，會對平常生活、平常稠使其乇共加添遘裡勢其意義、標志亂由做，但是伊儂其實都無拒斥者嚽。鬅客運動本身就野商業化。隨著經濟復蜀回變好，鬅客野激烈其標新立異也融入主流文化臺中，成為時尚。許蜀種玩世不恭其時髦味共顛覆味其鬅客語匯，對時裝設計共時尚刊物帶去野大其影響。將鬅客服裝或且新浪潮服裝帶裡主流文化其最重要其設計師，是英國儂薇薇安·魏斯伍德。另蜀隻設計鬅客衣裳其英國儂讚德拉·羅德斯（Zandra Rhodes，1940年出生）作品風格故溫和，得遘故価野富其儂共野出名其儂其認可。

着視覺傳達領域臺中，鬅客同蜀樣經歷了乞馴化其過程。對比早期其鬅客刊物，共之後出現、復會乞儥仈其儂看做屬於鬅客文化其時尚雜志，就會明顯看出鬅客蔣蔣乞馴化。美國其《鬅客》（Punk）、英國其《吸之毒》（Sniffin' Glue）是有代表性其鬅客刊物，但是都隨著鬅客文化乞馴化只蜀隻過程停刊了。

各地

敆美國，紐約是鬅客文化其中心。鬅客第一開始㑚有蜀部分青年哥愛做。之後也行出紐約，行裡主流其群體，罔來罔価美國後生囝愛總款做。有其中上層其學生，早起頭做盡臒，暝晡就做鬅客。譬喻講有其儂暝晡出門，罷嬭覷儥着了，別針掏穿鼻𡅏。