福州話音韻系統

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

茲篇文章專門介紹福州話其音韻系統。

音韻

按滿清辰候其音韻書《戚林八音》裏勢其講法，福州話都領有33芘韻母，15芘聲母共8芘聲調（實際僅有7芘）。今旦福州話其音韻體系大體上共許辰候差不多。但是，今旦福州話固有韻母跟聲調發生「松韻化」或者「緊韻化」，聲母發生「鼻音化」等等其現象。嚽都是《戚林八音》裏勢無體現出來其。另外，福州話其口語固有相當複雜其聲調變化規則。

聲調

福州話有7芘聲調。按《戚林八音》裏勢其講法，茲7芘聲調是「上平」「上聲」「上去」「上入」「下平」「下去」「下入」。古漢語其「上上」共「下上」敆福州話裏勢已經合蜀堆變成蜀芘號𡅏「上聲」其聲調去了。

下底茲張表格是使五度標音法來標示出7芘聲調其調值其。聲調敆漢語學界裏勢其對應名稱寫着最尾許蜀直裏勢。聲調調值是按福州腔做標準其。

《戚林八音》其 聲調名稱	圖形標示	數字標示	學界裏勢其 對應名稱
上平	˥˥	55	陰平
上聲	˧˧	33	陰上/陽上
上去	˨˩˦	214	陰去
上入	˨˦	24	陰入
下平	˥˧	53	陽平
下去	˨˦˨	242	陽去
下入	˥	5	陽入

聲母

福州話有15芘聲母，嚽就是儂家平常講其「十五音系統」。僅是按發音部位來分其話，茲15芘聲母會分「喉嚨組」、「嘴皮組」、「牙一組」、「牙二組」四組。

福州話聲母體系表

組別	無氣音	有氣音	鼻音	其他
喉嚨組	k	kʰ	ŋ	ʔ	h / ɸ
嘴皮組	p	pʰ	m	β
牙一組	ts / tɕ	tsʰ / tɕʰ	ɳ	ʝ	z
牙二組	t	tʰ	n	l	s / ɕ / θ / f

1) 綠色方格裏勢其聲母僅敆口音音變其辰候出現。

2) 聲母/β/, /ʝ/ 共 /z/ 是cŏk-ĭng/dĕ̤k siăng-mō̤.

3) 聲母 /s/ 敆福州話北部共南部其腔裏勢（譬如羅源或者福清讀/θ/。學「siang」 讀 /θiaŋ/）。

4) 聲母 /s/ 有儂會將伊讀做 /f/。

學 「mò̤ chiŏk mò̤ sê̤ṳ」 讀 /mo tɕʰyo mo føy/.

5) 有其學者見覺福州話聲母/h/ 共sá̤-ông /i/, /y/ 相拼其辰候讀做 /x/.

6) 聲母共 /h/ 共/u/ 韻相拼其辰候，羅源腔讀做 /ɸ/.

學 「Hū-muòng」 /ɸu muoŋ/.

7) 聲母/ts/, /tsʰ/, /s/ 敆 sá̤-ông /i/, /y/ （共茲兩芘sá̤-ông 敆前斗其sĕ̤ng-ông-mō̤）前都時候軟化，讀做/tɕ/, /tɕʰ/, /ɕ/。茲三芘聲母敆韻母/ɛ/前斗其時候，有儂也讀做軟音。

學 「mò̤ chiŏk mò̤ sê̤ṳ」 讀/mo tɕʰyo mo føy/.

8) 敆長樂腔臺中，無 /n/ 茲芘聲母，所有 /n/ 聲母其字都合遘/l/聲裏勢去了。

學: Lêng = Nêng /lɛiŋ/.

9) 福州其中年儂共後生囝敆講話其辰候已經無分 /l/ 共 /n/ 了。（當然，有經過培訓其儂會分茲兩芘聲母）。洋當池是 /l/聲其字合遘 /n/聲裏勢。

學 Lêng = Nêng = /nɛiŋ/.

《戚林八音》裏勢其福州話聲母共聲母字都敆下底其表格臺中：

聲母字	柳	邊	求	氣	低
國際音標	l	p	k	kʰ	t
聲母字	波	他	曾	日	時
國際音標	pʰ	tʰ	ts	n	s
聲母字	鶯	蒙	語	出	喜
國際音標	ʔ	m	ŋ	tsʰ	h
聲母字	打	掌	與	君	知
國際音標	茲五字表示其聲母懸頂已經出現過去了。

韻母

福州話其單韻母有11芘，除開/i/, /y/, /u/以外，都有開、鉚2種對立其發音，嚽也號𡅏松韻共緊韻。

單雙韻母

單韻母表

Lôi-biék	韻母
鉚類	a	e	ø	i	y	u	o
開類	ɑ	ɛ / æ	œ				ɔ

1) 有其學者見覺 /e/其開韻該當是 /æ/。

雙韻有31芘，大部份也有開共鉚兩種對立其發音。

雙韻母表

類別	韻母
鉚類	ai	au		eu
開類	ɑi	au	ɛi	ɛu
鉚類	ia	ie	ieu	iu
開類	iɑ	iɛ	iɛu
鉚類	øy	yo	ya
開類	ɔy	yɔ
鉚類	ua	uai	uo	uoi	ui
開類	uɑ	uɑi	uɔ	uɔi	oi
鉚類	ou	iau
開類

1) 《戚林八音》裏勢無/iau/者韻。茲芘韻母會𣍐中算福州話其正式韻母，敆學術界固有爭論。大部份學者見覺伊伓是正式其韻母；不過有其字典共學術論文復將伊廮遘韻母體系裏勢。

2) 韻母/ya/ 敆今旦其福州話裏勢已經討𣍐着了。按《太史林碧山字義便覽》其講法，茲芘 (Hṳa 韻) 韻部其字僅有4芘。茲3字敆今旦福州話裏勢其情況是總款其：1字歸遘 /ai/ 韻 (cṳā > cāi), 1 字歸遘 /ie/ 韻 (hṳa > hie), 1 字歸遘 /ɛ/ 韻 (hṳa > ha̤)。

3) 古田腔將/yo/ 讀做 /yø/。現在總款其讀法敆福州腔裏勢也開始流行去了，特別是敆後生囝臺中。

4) 韻母/uoi/ 共 /ui/ （包括茲兩芘其開韻）敆大部份地區已經合成蜀芘韻去了，僅有古田腔共平潭其福清腔固無合蜀堆。

5) 韻母 /iu/ 共 /ieu/（包括伊其開韻）敆大部份地區已經合成蜀芘韻去了，僅有古田腔共平潭其福清腔固無合蜀堆。

6) 韻母/ieu/ 共 /iɛu/ 敆古田腔裏勢讀 /iəu/ 或者 /iau/。

鼻音韻母

鼻音韻母表

類別	韻母
鉚	aŋ	eiŋ
開	ɑŋ	ɑiŋ
鉚	iŋ	iaŋ	ieŋ
開	ɛiŋ	iɑŋ	iɛŋ
鉚	yŋ	øyŋ	yoŋ
開		ɔyŋ	yɔŋ
鉚	uŋ	uaŋ	uoŋ
開	ouŋ	uɑŋ	uɔŋ
鉚		m̩ / n̩ / ŋ̍
開	ɔuŋ

1) 福州話僅有蜀芘聲化韻 /ŋ̍/。但是 /ŋ̍/ 敆口語音變臺中受遘後梢其影響發生變化，固會產生兩芘新其聲化韻 /m̩/ 共 /n̩/.

ng sê /ŋ̍ sei/ >> /n̩ nei/

ng biáng /ŋ̍ piɑŋ/ >> /m̩ miɑŋ/

2) 福州話裏勢讀聲化韻/ŋ̍/其詞僅有兩芘，並且都是hâ-ké̤ṳ siăng。蜀芘是否定詞「n̂g」（「伓」），蜀芘是 「使，放」其 「n̂g」（「伓」），頭頭許蜀芘「n̂g」敆口語臺中大部份情況讀「ĭng」，第二芘敆口語臺中讀做「ŭng」。

Ng sāi giăng /ŋ̍ sai kiaŋ/ >> /iŋ nai kiaŋ/

Ô ng-ng mò̤ /ou ŋ̍ ŋ̍ mo/ >> /u ʔuŋ ʔuŋ mo/

3) 韻母 /ɑiŋ/ 敆福清腔裏勢讀/æŋ/，有其儂固會敆 /æ/ 後梢加蜀隻輕聲其/i/，讀成 /æiŋ/。按總款發展，福清腔裏勢其/æŋ/ 遲早也會變共福州腔蜀樣，最終齊讀 /ɑiŋ/。

4) 韻母 /øyŋ/ 敆福清腔裏勢讀/œŋ/，有其儂固會敆 /œ/後梢加蜀隻輕聲其 /y/，讀成/œyŋ/。按總款發展，福清腔裏勢其/œŋ/ 遲早也會變共福州腔蜀樣，最終齊讀/øyŋ/。

韻尾

韻尾表

類別	韻母
鉚	akˀ	eikˀ
開	ɑkˀ	ɑikˀ
鉚	ikˀ	iakˀ	iekˀ
開	ɛikˀ	iɑkˀ	iɛkˀ
鉚	ykˀ	øykˀ	yokˀ
開	øykˀ	ɔykˀ	yɔkˀ
鉚	ukˀ	uakˀ	uokˀ
開	oukˀ	uɑkˀ	uɔkˀ
鉚	œkˀ	oukˀ
開		ɔukˀ

韻尾表

類別	韻母
鉚	aˀ	iaˀ	uaˀ
開	ɑˀ	iɑˀ	uɑˀ
鉚	oˀ	uoˀ	yoˀ
開	ɔˀ	uɔˀ	yɔˀ

音變現象

福州話有野豐富其音韻變化現象。在伊是變化形式固是變化方位敆漢語族裏勢都是真有特色其。

福州話其音韻變化伓是本底就有其，按學者其研究，茲芘變化更更是趁清朝後期其辰候發生其，並且敆十邑僻其山區固無總款其現象。

福州話其音韻變化有3類：聲母，韻母，聲調。敆茲3類裏勢，聲母變化特有其規則特簡單，聲調變化特複雜。

聲母

• 福州話聲母變化是3類音韻變化臺中特簡單其。變化規則按聲母其發音部位分「喉嚨」、「嘴皮」、「牙齒1」、「牙齒2」四組，再按前梢字其韻尾分「空韻尾」、「鼻韻尾」、「塞韻尾」3種。

喉嚨組

喉嚨組其聲母都領有/k/, /kʰ/, /h/, /ŋ/ 共 /ʔ/ 5芘。

字其聲母是喉嚨組聲母/k/, /kʰ/, /h/，者字僅敆空韻尾其字後梢辰候，茲三芘聲母變成 /ʔ/。

gá-cṳ̆ gĭ　　/kɑ tɕy ki/ 　>　/ka ʝy ʔi/

ngā-kī　　/ŋa kʰi/　>　/ŋa ʔi/ (> /ŋai/)

sé hông　　/sɛi houŋ/　>　/si ʔouŋ/

字其聲母是喉嚨組，者字敆空韻尾其字後梢辰候，聲母變做/ŋ/。

kēng giāng　　/kʰeiŋ kiaŋ/　>　/kʰeing ŋiaŋ/

găng-ké-tiáng　　/kaŋ kʰɛi tʰiɑŋ/　>　/kaŋ ŋi liɑŋ/

săng-hông　　/saŋ houŋ/　>　/saŋ ŋouŋ/

huăng ák　　/huaŋ ʔɑkˀ/　>　/huaŋ ŋɑkˀ/

字其聲母是喉嚨組，者字敆塞韻尾其字後梢辰候，聲母無變化。

嘴皮組

嘴皮組其聲母有/p/, /pʰ/ 共 /m/ 3 芘。

字其聲母是嘴皮組聲母/p/, /pʰ/，者字敆空韻尾其字後梢辰候，茲2芘聲母變做特韻母/β/。

cī-bŏng　　/tɕi pouŋ/ 　>　/tɕi βouŋ/

chói-puòi　　/tsʰoi pʰuoi/　>　/tsʰui βuoi/

字其聲母是嘴皮組，者字敆鼻韻尾其字後梢辰候，聲母變做/m/。

bēng bàng　　/peiŋ paŋ/　>　/peing maŋ/

Nìng-pŏ̤　　/niŋ pʰo/　>　/niŋ mo/

字其聲母是嘴皮組，者字敆塞韻尾其字後梢辰候，聲母無變化。

牙1組

牙1組其聲母僅有/ts/, /tsʰ/ 2芘聲母。

字其聲母是牙1組聲母/ts/, /tsʰ/，者字敆空韻尾其字后梢辰候，有兩種變化。聲母/ts/, /tsʰ/ 共 /i/, /y/ (或者以 /i/, /y/ 做半母音，學 /ia/, /yokˀ/） 相拼辰候，/ts/, /tsʰ/ 變做特聲母/ʝ/。其他情況變做特聲母/z/。

gá-cṳ̆　　/kɑ tɕy/ 　>　/ka ʝy/

ké-chiă　　/kʰɛi tɕʰia/　>　/kʰi ʝia/ (> /ki ja/)

cū-cŭng　　/tsu tsuŋ/ 　>　/tsu zuŋ/

chék-chék　　/tsʰɛikˀ tsʰɛikˀ/ 　>　/tsʰi zɛikˀ/

內部差別

福州話內部其差別比較大，但茲差別大部分是敆音韻裏勢，當地儂告嚽號𡅏「腔」。僅按腔來分其話，福州話會分「福州腔」、「福清腔」、「古田腔」三種。

福州腔

閩江流域所講其福州話基本是屬茲種腔。地理上包括福州市、閩侯縣中南部、連江縣、長樂縣，共永泰縣東部。

福州因為是省督所在，歷史以來儂都見覺嚽塊其腔是標準腔。

共《戚林八音》siŏng pàng，福州腔音韻體系已經發生總款變化：

1 「Chiu」韻共「Sieu」韻合蜀堆變成蜀芘韻--/ieu/

(Hók-)ciŭ = (lăk-)ciĕu = /tsieu/

2 「Hui」韻共 「Buoi」韻合蜀堆變成蜀芘韻 --/uoi/

puòi(-à̤) = pùi(-tàng) = /pʰuoi/

3 聲母敆字臺中辰候發生聲母類化或者鼻音化

dĭ sék /ti sekˀ/ --> /di leʔ/

Băng-báik /paŋ pɑikˀ/ --> /paŋ mɑiʔ/

4 韻母共陰入連兩芘去聲調拼讀時候，變做開韻或sĕ̤ng-ông.

福清腔

福清腔主要敆福清共平潭兩芘地方使。

福清腔其韻母體系共韻書《戚林八音》懸頂講其韻母體系差𣍐去遠。但是着現在福清後生囝講其福清話裏勢，「Chiu」共「Sieu」， 「Buoi」共 「Hui」已經分𣍐清楚去了。

共福州腔其差別

聲調差別

福州腔共福清腔最大其差別是着聲調調值懸頂，在汝是單字聲調固是口語臺中其變調。學「tiăng」（聽）敆福州腔讀/tiaŋ˥˥/，福清腔讀/tiaŋ˥˧/.

聲母差別

平話字字母 「S」 敆福州腔臺中讀 /s/，敆福清腔臺中讀 /θ/。

韻母差別

雖然講福清腔其韻母體系共福州腔完全māu-dáe̤k，但是福清話其韻母共福州腔固是有差別，特明顯其差別是福清腔其雙韻母無像福州腔許滿価。

古田腔

古田腔是古田共屏南兩芘縣講其福州話其腔。定着古田腔敆各種福州話其腔臺中，音韻體現變化特嫩其。古田腔音韻體系共《戚林八音》裏勢其音韻體系完全對鉚。福州腔共福清腔其韻母都會跟聲調發生變化，就僅古田腔固未發生總款其變化。