參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.


福州閩王祠其王審知像

王審知(862年—925年),字信通,是五代十國其辰候閩國其開國皇帝。

根據《十國春秋》其講法,王審知是琅琊王氏蜀族其儂,祖宗是秦朝其將軍王翦。伊敆光州固始(今旦河南省固始縣)出生,懸頂有兩隻兄弟哥,號𡅏王審潮王審邽。王潮是唐朝固始縣其長史。881年,王緒造反,拍入光州,將三隻兄弟哥拿去。王緒野看重伊三隻,讓伊各儂做將軍。885年,三隻兄弟哥跟王緒拍遘福建,部隊糧食無夠,王緒無讓將軍共兵囝帶家屬,各儂都野受氣。王審潮就共其他幾隻將軍合謀,刣死王緒,自家做元帥。第二年拍下泉州,福建觀察使陳巖任命王審潮做泉州刺史。

891年,陳巖病野狠,派儂告王審潮來福州,卜想乞伊軍權。但是王審潮儂固未遘陳巖就死去了。陳巖其親家舅范暉,敆福州自稱留後,無讓伊來。王審潮派王審知共王彥復去拍福州,最終敆893年統一福建。王審潮做福建觀察使,王審知做福建副觀察使。

898年,王審潮病野狠,雖然講王審潮有四隻囝,王審潮見覺自家其囝弟都無王審知本事,最尾就讓王審知接班。唐昭宗封王審知做「福建觀察使」「威武軍節度使」「琅琊王」。

909年,後梁太祖封王審知做「閩王」,王審知正式開國,定都城敆長樂(是着今旦其福州,伓是長樂市)。王審知在位其辰候,共邊兜國家關係做野和,盡力量其避免戰爭。敆經濟方面,開銷節儉,減輕賦稅共勞役,鼓勵通商,復起野価學校教儂讀書,對福建(特別是福州)貢獻野大。

王審知敆925年病死,由長子王延翰接班。廟號號𡅏閩太祖,諡號號𡅏昭武孝皇帝。伊其墓號𡅏宣陵,敆福州晉安區新店其斗頂村夫塊。

王審知其囝弟全敗囝,荒淫無道,自相殘殺,最尾閩國敆945年乞南唐滅囇。

王審知對福州其發展貢獻野大,福州儂對伊當神來拜,告伊「開閩聖王」。福州有野価王審知其廟或者祠堂,最出名其是鼓樓區其忠懿閩王祠。野価姓王其福建儂認王審知做自家其祖宗。

家族 Siŭ-gāi

  • 郎爸:王恁
  • 娘奶:秦國太夫人董氏
  • 子:
  • 女:
    • 琅琊郡君,嫁乞李敏
    • 張思齊其老媽
    • 琅琊郡君,嫁乞吳越王子錢元珦
    • 余廷隱其老媽
    • 固有三隻諸娘囝