國際象棋

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

國際象棋乍開始起排法

國際象棋也號𡅏西洋棋，是蜀種棋類遊戲，着今旦國際懸頂客佻其儂嘢価。

國際象棋由兩隻儂行，蜀隻儂拈白其子，蜀隻儂拈烏其，其中拈白其着先行。每蜀方其棋臺中都有1粒國王、1粒王后、2粒象（也號𡅏教士）、2頭馬（也號𡅏騎士）、2粒車（也號𡅏城堡）共8粒兵。去拍國王號𡅏將軍，僅是國王乞儂將軍以後無塊走就號𡅏殺棋，乞儂殺棋其許蜀方就輸了。僅是夫儂都無辦法將對方其國王刣囇，就號𡅏和棋。

國際象棋其棋盤是蜀組8*8其方格，每蜀隻格格都塗上烏或者白其顏色，共間壁其格格區別開來。

歷史

兩隻14世紀其德國貴族敆𡅏客佻棋

國際象棋其祖宗是印度其恰圖蘭卡。恰圖蘭卡也是蜀種棋類遊戲，共今旦國際象棋其棋盤共棋子都盡去像。

恰圖蘭卡差不多着薩珊帝國國王霍斯勞一世在位其辰候傳遘波斯。這國王對文學共哲學感興趣，由印度夫塊掏嘢価其書遘波斯。印度儂也將恰圖蘭卡帶遘這國王夫塊，伊見覺嘢有味，將這其改造成沙特蘭茲掏來客佻。這沙特蘭茲傳遘蒙古、阿拉伯、衣索比亞、西班牙、德國等等國家，發展出蒙古象棋、本營象棋、衣索比亞象棋、西班牙大象棋、信使象棋各種象棋，最終發展成今旦其國際象棋。

象棋遊戲傳遘歐洲差不多是中世紀其事計。許辰候這遊戲着歐洲國家僅乞貴族客佻其，茲蜀陣儂專門掏嚽來訓練戰爭其策略，故此乞儂號𡅏“國王其客佻乇”。遘19世紀其辰候，乍開始有百姓客佻這遊戲。

恰圖蘭卡向南傳遘斯里蘭卡、緬甸、泰國、柬埔寨、馬來西亞等等東南亞國家，發展出泰盧固象棋、緬甸象棋、泰國象棋、高棉象棋各種變體；另外蜀支，向東傳遘中國，乞中國儂改造成中國象棋，復乞朝鮮、日本儂改造成自家國家其朝鮮將棋共日本將棋。故此講恰圖蘭卡是所有象棋茲蜀類遊戲其祖宗，儂家着世界懸頂隨便兩隻象棋遊戲臺中都會發現共同點。

有其信伊斯蘭教其儂見覺客佻國際象棋是“褻瀆神明”其。根據《穆斯林聖訓實錄》（Sahih Muslim）裡勢其講法，先知穆罕默德有講過蜀句話：“客佻象棋其儂，共將手凸裡豬肉、豬血裡勢無什乇區別。”敆穆斯林其觀念裡勢，豬“蜀身都拉渣死”。茲本《穆斯林聖訓實錄》其地位着伊斯蘭教裡勢嘢懸，故此影響力眞大。不過，今旦客佻國際象棋其阿拉伯儂嘢価。

1981年，信伊斯蘭教其伊朗政府禁止儂客佻這棋；遘1988年其辰候乍由魯霍拉·何梅尼解除這禁令，但是𣍐允許儂獲嚽來賭錢。

像塔利班、伊拉克共沙姆伊斯蘭國（ISIL/ISIS）、蓋達組織（基地組織）總款保守其伊斯蘭教組織，都是𣍐允許儂客佻這棋其。

國際象棋其棋子共行法

棋其樣式

記其圖片

名字

英語

行法

行法圖片

國王

king

橫、直或者斜𡅏行蜀格（僅有王車易位其辰候會中橫𡅏行兩三格，下底會講）。𣍐使乞儂食囇。僅是自家其國王蜀死就輸了。

王后

queen

橫、直或者斜𡅏行。僅是無子堵着墿臺中，愛行幾步行幾步，故此是象棋臺中剃拈重要其棋。

車、
城堡

rook

橫橫式或者直直式行。僅是無子堵着墿臺中，愛行幾步行幾步，故此是國際象棋臺中剃拈重要其棋。
車固有蜀種特殊其行法號𡅏“王車易位”，下底會講。

象、
教士

bishop

斜𡅏行。僅是無子堵着墿臺中，愛行幾步行幾步。

馬、
騎士

knight

行L形路線：也就是講，着蜀隻2*3其長方形方格組裡勢，由蜀隻頂點沿對角線行遘對面其許隻頂點夫塊。不過共中國象棋𣍐蜀樣，國際象棋裡勢透底無馬骹這概念，故此着2*3其方格裡勢隨便都會行。馬是國際象棋裡勢最輪活其蜀頭子。

兵

pawn

行其辰候是直直式行，𣍐使橫式行或者後退；食其辰候斜𡅏食，先將嘻子掏囇，再將兵囝廮着嘻子原來其地方。
兵囝每蜀回都僅中行蜀格，不過，僅是兵廮着開始辰候其夫塊，也會中向前斗行兩步。固有蜀種奇怪其行法號𡅏“食過路兵”，下底會講。
兵囝行遘對方其最底許蜀橫以後，着變成王后、車、象或者馬臺中其蜀種；不過𣍐使變成國王，也𣍐使伓變。

特殊行法

國際象棋裡勢有三種特殊行法：“兵其升變”、“食過路兵”共“王車易位”。

兵其升變

兵囝行遘對方其最底許蜀橫以後，着變成王后、車、象或者馬臺中其蜀種；不過𣍐使變成國王，也𣍐使伓變。嚽就是“兵其升變”。故此雖然講蜀隻兵囝無什乇乇使，但是行遘最對面去其話，威脅就嘢大了。

食過路兵

對方其兵囝趁伊初始其地方向前斗行兩步其辰候（就是講嚽是這兵行其頭步其意思），僅是講行遘其地方邊兜有汝其兵囝，汝會使直接將這兵掏囇，再將汝自己其許隻兵囝廮着這兵其骿後（由汝茲蜀邊覷）。嚽就是“食過路兵”。

食過路兵其方法

白其先行，烏其兵着初始其位置（蜀步都未行過）

烏其兵向前斗行兩格，由f7行遘f5。

白其兵囝將烏其兵食囇，移遘f6。

王車易位

敆國際象棋裡勢，僅是國王未乞儂將軍過，國王共車都未定動過，復加𡅏兩頭臺中無其他其子子其話，國王會使向車許蜀邊移兩遘三格，再將車廮着國王其另外蜀邊。嚽號𡅏“王車易位”，也號𡅏“國王入堡”。國王共遠其車易位其辰候移三格，總款其易位號𡅏“長易位”；共近其車易位是移兩格，總款其易位號𡅏“短易位”。不過，𣍐使敆對方將軍其辰候易位。


短易位	長易位

記譜法

國際象棋有幾種記譜法，不過現在最稠使其是“代數記譜法”。一般都寫兩直，白其行法寫左邊，烏其行法寫右邊。這代數記譜法其符號生總款：

-：代表行。譬如講“馬 g1-f3”，意思是馬由g1行遘f3.前斗着寫行其是什乇棋，但是行兵也會使伓寫。
x：代表食子。譬如講“象 b5xc6”，意思是敆b5其象食囇敆c6其子。共行法蜀樣，着寫什乇棋去食，伓寫就是代表兵囝去食。
O-O：嚽代表蜀步短易位。
O-O-O：嚽代表蜀步長易位。
e.p.：寫着蜀步其骿後，代表茲蜀步是“食過路兵”。其中“e.p.”是法語“en passant”其縮寫，是“食過路兵”其意思。
+：代表將軍。寫着蜀步其骿後，像“馬 g1-f3 +”總款。
++：寫着蜀步其骿後，代表雙將軍，有兩隻子齊將軍。
#：寫着蜀步其骿後，代表殺棋，將軍以後對方其國王無塊走。
1/2-1/2：代表和棋。
1-0：代表白其贏。
0-1：代表烏其贏。

有其辰候書裡勢也會着蜀步骿後加入幾種符號來評價茲步行其蔣其：

!：行其無呆。
!!：行其嘢好。
?：行其𣍐好。
??：行其嘢差。
!?：總款行𣍐仈會蔣其。
∽：隨便行其蜀步。

下底是使代數記譜法記其蜀局棋：

步	白	烏
1	e2-e4	e7-e5
2	馬 g1-f3	f7-f6?
3	馬 f3xe5!	f6xe5?
4	后 d1-h5+	王 e8-e7
5	后 h5xe5+	王 e7-f7
6	象 f1-c4+	王 f7-g6??
7	后 e5-f5+	王 g6-h6
8	d2-d4+	g7-g5
9	h2-h4	象 f8-e7
10	h4xg5++	王 h6-g7
11	后 f5-f7 #	1-0

維基共享裡勢有共國際象棋有干過其內容。