漢字

"漢字" 是蜀篇漢字其文章，卜覷平話字版本"Háng-cê"，篤嚽塊。

漢字（Háng-cê，日語羅馬字： Kanji，朝鮮語羅馬字： Hanja，越南語國語字： Hán Tự）也號𡅏「中文」，是漢儂發明其書寫系統。漢字有4000幾年其歷史了，敆現刻時世界其文字系統臺中，是第一古老其。漢字是華語、日本語、韓語、越南語其書寫系統。中國大陸、臺灣、香港、澳門、馬來西亞、新加坡共其它國家底裡漢儂住其地方都會看有漢字。

福建簡稱「閩」其漢字寫法。

名字來由

「漢字」這詞第一早出現敆《金史》。下底是相關其記載。

「十八年，封金源郡王。始習本朝語言小字，及漢字經書，以進士完顔匡、司經徐孝美等侍讀」

（翻譯）第18年，冊封金源郡其郡頭。開始學自家國家其語言文字，也學漢字寫其經書。有進士完顔匡共司經徐孝美等儂敆伊旁邊陪伊齊讀。

漢字其原理

漢字做字過程會分出6類，茲価種就是平常講其「六書」。許慎敆《說文解字》底裡有茲六類字典名稱，分別是「象形」、「指事」、「會意」、「形聲」、「轉注」共「假借」。