分點
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.
分點，或且告二分點，是想像臺中天球赤道敆天球懸頂其位置，是每蜀年日頭穿過天球赤道共黃道敆天球懸頂交點其天文事件[1]，嚽讓地球懸頂各地其日晝共暝晡差不多蜀樣𣆯，也就是平常講其「二八平光」[2]:6。㑚有敆分點其許蜀瞬間，地球懸頂其日夜分界線（也就是分開日晝共暝晡其位處）乍會共赤道垂直，地球其南北兩半球乍會得遘同蜀樣其照明。 也就是講，分點是日下點正正好落着赤道懸頂其唯一其時刻，徛着赤道，額起頭，會看見日頭敆頭頂正上方。
分點每蜀年會出現兩回，號𡅏春分共秋分。春分大約敆新曆3月21號，舊曆2月。秋分大約敆9月23號，舊曆8月。故此使「二八平光」形容者兩工日晝共暝晡蜀樣𣆯[2]:6。敆春分其辰候，日下點由南向北通過赤道。秋分就是日下點由北向南通過赤道。 分點共至點共每蜀年其季節直接有干過。北半球野価其文明敆傳統懸頂將3月其春分點當做春天其開始，將9月其秋分點當做秋季其開始。南半球其春分點敆9月，秋分點敆3月。