華林寺
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.
華林寺是福建省福州其一隻出名其寺。者廟起著鼓樓區屏山南勢，坐北朝南，西向是福建省人民政府其大院，南向是鼓屏路共華林路其交叉墿口。
華林寺起著北宋乾德2年（964年），伊其大殿是南部中國現在保存最舊其一隻建築，乞中國國務院定做全國重點文物保護單位。
歷史 Siŭ-gāi
華林寺是閩國皇帝其一隻宮殿。閩國滅亡以後，福州乞吳越國佔領。964年，福州郡守鮑修讓將閩國皇帝宮殿拆唻，將拆下來其材料下遘屏山南勢起一隻廟，號𡅏「越山吉祥寺院」，者廟就是以後其華林寺。
許辰候者廟裡勢固有文昌閣、普陀寺共正殿等等野価其建築，其他其建築都是以後起其。宋朝其王繼先原來乞儂逐遘福州其者廟來，伊共宋高宗關係𣍐呆，遘尾了宋高宗寫「越山」共「環峰」4字，送乞者寺。南宋其官僚張浚著嚽塊讀過書，將軍李綱也來嚽塊客佻過。
者廟著明朝宣德6年（1431年）重新起。正統9年（1444年），改名號𡅏華林寺，明英宗寫「華林寺」3字其匾額掛著面前，者匾額遘今旦固掛著夫塊。1506年，邊兜其羅漢院共越山庵也合遘華林寺裡勢來，遘尾了復起野価建築，屏山南勢都是華林寺其地方。
華林寺乞火燒過一回，1818年遘1826年之間做過野大其修理。1958年文物普查辰候，乞確認是長江以南最舊其一隻建築物。文化大革命其辰候，福建省政府機關搬遘屏山，將華林寺其大部份建築物掏拆唻，儷剩大殿掏𡅏廮資料。1982年，華林寺乞國務院公佈是國家重點文物保護單位。1984年，國家文物局按原來其樣式重新修復，復按原來其樣式重新起山門，東配殿，西配殿，回廊等等建築。者工程著1989年10月完工。
參考資料 Siŭ-gāi
- 《福州市志 第七冊》